Encouraging Thoughts

"விசுவாசம் அதுதானே எல்லாம்?"

நாம் இந்த உலகில் வாழும் போது, அது விசுவாசத்தின் அடிப்படையில் தான். அடுத்த நிமிடம் என்ன நடைபெறுமோ என்று தெரியாத நிலையில், நாம் ஏதோ ஒரு விஷயத்தை அல்லது எவராவது ஒருவரை நம்பி வாழ்கிறோம். 

காணாத விஷயங்களில் நம்பிக்கை அல்லது தெளிவான சாட்சிகள் இல்லாமல், எதையாவது அல்லது மற்றவரை நம்புவது தான் விசுவாசம். 

வாழ்க்கையில், நம் புரிதலுக்கு அப்பாற்பட்ட விஷயங்களில் நாம் நம்பிக்கை வைக்கிறோம். ஆவிக்குரிய விஷயங்களில், நம்பிக்கை என்பது இன்னும் காணப்படாததை நம்புவதும், எதிர்காலத்திற்கான தேவனுடைய வாக்குறுதிகளைப் பற்றிக் கொள்வதும் ஆகும்.

எபிரெயர் 11:1 இல் நாம் இவ்வாறு வாசிக்கிறோம்: "விசுவாசமானது நம்பப்படுகிறவைகளின் உறுதியும், காணப்படாதவைகளின் நிச்சயமுமாயிருக்கிறது ." 

இன்றைய தலைமுறையினருக்கு, இந்த வசனம் விசுவாசம் என்பது காணக்கூடியதைத் தாண்டியது என்பதை நினைவூட்டுகிறது. உடனடி பலன்களைக் காணாவிட்டாலும் கூட, தேவனுடைய திட்டத்தில் நம்பிக்கை வைக்க இது நமக்கு சவால் விடுகிறது.   

ஒரு விதையை நடுவதைப் பற்றி யோசித்துப் பாருங்கள். பூமிக்கடியில் நடக்கும் செயல்முறையை நாம் பார்க்க முடியாவிட்டாலும், காலப்போக்கில் அது முளைக்கும் என்று நம்புகிறோம். விசுவாசம் அதே வழியில் செயல்படுகிறது - நாம் முழுப் படத்தையும் பார்க்காமல் இருக்கலாம், ஆனால் கர்த்தர் செயல்பாட்டில் இருக்கிறார் என்ற நம்பிக்கை நமக்கு இருக்கிறது. அவருடைய வாக்குறுதிகளை நிறைவேற்ற அவருடைய கிருபையிலும் வல்லமையிலும் நாம் நம்பிக்கை கொள்கிறோம்.

சங்கீதம் 118:8-9 கூறுகிறது, “மனுஷனை நம்புவதைப் பார்க்கிலும், கர்த்தர் பேரில் பற்றுதலாயிருப்பதே நலம். பிரபுக்களை நம்புவதைப் பார்க்கிலும், கர்த்தர் பேரில் பற்றுதலாயிருப்பதே நலம்.” கர்த்தர் மீது நம்பிக்கை வைப்பது மனிதனின் எல்லா நம்பிக்கையையும் மிஞ்சும்.

நாம் விரும்புவதை எப்போதும் பெற முடியாமல் போகலாம், ஆனால் நாம் கர்த்தரை நம்பினால், அவர் நம் எதிர்பார்ப்புகளுக்கு அப்பால் நம்மை ஆசீர்வதிப்பார். அவருடைய சக்தி வரம்பற்றது. கடினமான மற்றும் ஏமாற்றமளிக்கும் காலங்களில் கூட, கர்த்தர் மீதான நம்பிக்கை சாத்தியமற்றதை சாத்தியமாக்கும்.

விசுவாசிகளின் தகப்பனாகிய ஆபிரகாமை எடுத்துக் கொள்ளுங்கள். ரோமர் 4:3 கூறுகிறது, "ஆபிரகாம் தேவனை விசுவாசித்தான், அது அவனுக்கு நீதியாக எண்ணப்பட்டது." எல்லா நம்பிக்கையும் இழந்துவிட்டதாகத் தோன்றியபோதும் - அவரும் சாராளும் குழந்தைப் பேறு வயதுக்கு அப்பால் இருந்தபோதும் - அவர் விசுவாசத்தைப் பற்றிக்கொண்டார். அவர் தயங்கவில்லை, மாறாக பலமடைந்து, கர்த்தருக்கு மகிமையைச் செலுத்தினார்.

யோவான் 20:24-ல் இயேசு தோமாவிடம், "காணாமலும் விசுவாசிக்கிறவர்கள் பாக்கியவான்கள்" என்று கூறியதாக பதிவு செய்யப்பட்டுள்ளது. இன்று நாம் எவ்வளவு பாக்கியவான்கள்! நாம் அவரை உடல் ரீதியாகப் பார்க்காமல் இருக்கலாம், ஆனால் விசுவாசத்தின் மூலம், நம் உள் கண்களால் அவரைக் காண்கிறோம்.

லூக்கா 18:27 நமக்கு நினைவூட்டுகிறது, “மனுஷரால் கூடாதது தேவனால் கூடும்.” எந்த சவாலோ, போராட்டமோ, கனவுகளோ தேவனால் அடைய முடியாதவை அல்ல. மன அழுத்தமும், சுய சந்தேகமும் நிறைந்த உலகில், இந்த வசனம் நம்மை அவர் மீது நம்பிக்கை வைக்க அழைக்கிறது. நாம் அவர் மீது நம்பிக்கை வைக்கும்போது, கர்த்தர் சாத்தியமற்றவற்றை சாத்தியங்களாக மாற்றுகிறார்.

"கர்த்தாவே, எங்கள் விசுவாசத்தை வர்த்திக்கப்பண்ணும்" என்ற சீடர்களின் ஜெபத்தை நாமும் ஜெபிப்போமாக. ஒவ்வொரு நாளும் கர்த்தர் மீது அசைக்க முடியாத நம்பிக்கையுடன் நடப்போம்.

கர்த்தருடைய நாமம் மகிமைப்படுவதாக!

Writer - Sis Shincy Jonathan Australia 🇦🇺

Translation- Sis Tephila Mathew

Mission Sagacity Volunteers